Tvinninq
layihəsinin “Kredit sistemi ilə bağlı hüquqi sənədlərə düzəlişlərin edilməsi
yolu ilə kreditlərin təlim nəticələri və tələbənin dərs yükünə əsaslanmasının təmin
edilməsi” adlı 4.4 saylı Fəaliyyəti çərçivəsində birinci missiya 3-7 fevral
2020-ci il tarixlərində baş tutmuşdur.
Sözügedən
Fəaliyyət çərçivəsində missiya Fransanın Lion 2 Universitetinin hal-hazırda təqaüddə
olan professoru Jean-Luc Lamboley tərəfindən həyata keçirilmişdir.
Missiyanın əsas məqsədi Azərbaycan
universitetlərində tədris prosesində AKTS (Avropa Kredit Transferi Sistemi)
kreditlərinin tətbiqinin asanlaşdırılması məqsədi ilə təlimat kitabçasının
hazırlanması olmuşdur. Bundan başqa, hazırlanacaq həmin sənədin məqsədi xaricdəki təhsil müddətləri zamanı əldə olunmuş kreditlərin universitetlər tərəfindən
tanınmasını asanlaşdırmaq, beləliklə də tələbə mobilliyini daha da təşviq etməkdir.
Bu məqsədlə fransalı ekspert universitetlərdə
tədris prosesinin nizamlanması ilə bağlı başlıca sənədləri nəzərdən keçirmiş,
eləcə də universitetlərdə tələbə mobilliyi və AKTS kreditlərinin tanınmasına
cavabdeh olan struktur bölmələrinin nümayəndələri ilə görüşmüş və onların bu
sahədə üzləşdiyi çətinliklərlə tanış olmuşdur.
Bundan başqa, ekspert Təhsil Nazirliyinin Elm,
ali və orta ixtisas təhsili şöbəsinin əməkdaşları ilə görüşmüş və ölkə
universitetlərində kredit sisteminin tətbiqi ilə bağlı cari vəziyyət barədə məlumat toplamışdır.
Tvinninq
layihəsinin eksperti missiyanın nəticəsi olaraq hazırlayacağı sənədi Təhsil
Nazirliyinin müvafiq şöbəsinə təqdim edəcəkdir.