2-7 dekabr
2019-cu il tarixlərində Tvinninq layihəsinin “Hər bir pilot universitetdə
prioritet sahədən olan təhsil proqramının simulyativ akkreditasiyasının həyata keçirilməsi”
adlanan 3.7 saylı fəaliyyəti çərçivəsində sayca dördüncü missiya həyata keçirilmişdir.
Missiya Latviyanın
Ali təhsidə keyfiyyət agentliyinin direktoru Jolanta Silka və Fransanın
Strasburq Universitetinin professoru Jean-Marc Planeix tərəfindən həyata
keçirilmişdir.
Missiyanın
məqsədi Tvinninq layihəsinin pilot universitetləri olan Bakı Dövlət Universiteti,
Azərbaycan Dövlət Neft və Sənaye Universiteti, Bakı Mühəndislik Universiteti və
Sumqayıt Dövlət Universitetində Kimya mühəndisliyi ixtisası üzrə tədris olunan təhsil
proqramlarının simulyativ qiymətləndirilməsinin aparılması olmuşdur.
Yuxarıda
qeyd olunan təhsil proqramlarının simulyativ qiymətləndirilməsinə cəlb olunmuş
ekspert qrupu iki sahə ekspertindən (bir yerli və bir Avropa İttifaqı eksperti
olmaqla), iki keyfiyyət təminatı ekspertindən (bir yerli və bir Avropa İttifaqı
eksperti olmaqla), bir tələbə və bir işəgötürəndən təşkilatın nümayəndəsindən
ibarət olmuşdur.
Missiyanın
ilk günü ekspertlər Təhsil Nazirliyinin Akkreditasiya şöbəsində toplaşaraq
ATM-lərin Kimya Mühəndisliyi proqramı üzrə təqdim etdikləri özünütəhlil
hesabatlarını müzakirə etmiş, müsahiblər zamanı veriləcək sualları üzərində iş
aparmış və digər lazimi hazırlıqları aparmışlar.
Daha sonra
ekspertlər hər dörd universitetə bir günlük səfər etmişlər. Sahə səfərləri çərçivəsində
universitetlərin rəhbərliyi, özünütəhlil hesabatını hazırlayan qrupun üzvləri,
tələbələr, həmin proqramı bitirmiş məzunlar və işəgötürən təşkilatların nümayəndələri
ilə müsahibələr keçirilmişdir. Ekspertlər həmçinin Kimya mühəndisliyi təhsil
proqramının tədrisində istifadə olunan maddi-texniki bazanı qiymətləndirmək məqsədi
ilə universitetlərin auditoriyalarına və laboratoriyalarlna baxış keçirmişlər.
Simulyativ
qiymətləndirmənin nəticəsi olaraq ekspert qrupu tərəfindən hər bir pilot
universitetdəki Kimya mühəndisliyi təhsil proqramı üzrə yekun qiymətləndirmə
hesabatı hazırlanaraq həmin proqramın daha da təkmilləşdirilməsi istiqamətində tövsiyələr
veriləcəkdir.
Tvinninq
layihəsi çərçivəsində pilot olaraq seçilən digər təhsil proqramlarının (İnformatika
müəllimliyi, Kompüter elmləri və Xarici dil müəllimliyi) simulyativ qiymətləndirilməsi
növbəti həftələrdə davam edəcək.