17- 21 iyun
2019-cu il tarixlərində Avropa İttifaqının Tvinninq proqramının “Azərbaycanda
ali təhsilin gücləndirilməsinə dəstək” layihəsi çərçivəsində Azərbaycana növbəti
ekspert missiyası həyata keçirilmişdir.
Tvinninq layihəsinin “Təhsil proqramlarının tələbələrə əsaslanan
yanaşmanı əks etdirməsi məqsədi ilə keyfiyyət təminatı sisteminin daha da təkmilləşdirilməsi”
adlı üçüncü komponenti çərçivəsində
ölkəmizə Litvanın İdarəetmə və İqtisadiyyat Universitetinin (ISM University of
Economic and Management) Keyfiyyət Mərkəzinin direktoru Yolita Butkiene, həmin ölkənin Vilnüs
Gediminas Texniki Universitetinin tədris işləri üzrə prorektoru Nora
Skaburskiene və Latviyanın Ali Təhsildə Keyfiyyət Agentliyinin
(QAHE) direktor müavini Yolanta Silka səfər etmişlər.
Missiyanın məqsədi pilot olaraq seçilmiş ali təhsil müəssisələrini
özünütəhlil hesabatlarının
yazılması prosesində dəstəkləmək olmuşdur.
Missiya zamanı pilot ATM-lərdən konkret təhsil proqramları üzrə
(kimya mühəndisliyi, kompüter mühəndisliyi, Fizika, Kompüter elmləri, Xarici
Dil Müəllimliyi, İnformatika/Riyaziyyat müəllimliyi) özünütəhlil hesabatları
yazmış universitet nümayəndələri ilə görüşlər keçirilmişdir.
Azərbaycan
Dövlət Pedaqoji Universitetində təşkil olunmuş görüşlər zamanı Tvinninq layihəsinin
ekspertləri özünütəhlil hesabatını yazmış qruplarla ayrı-ayrılıqda görüşlər
keçirmiş, yazılmış hesabatların ikinci variantı üzərində müzakirələr aparılmış
və ekspertlər tərəfindən hesabatların daha da təkmilləşdirilməsi məqsədi ilə
tövsiyələr verilmişdir.
Qeyd
edək ki, sözügedən pilot prosesdə Bakı Dövlət Universiteti, Azərbaycan Dövlət
Pedaqoji Universiteti, Azərbaycan Dövlət Neft və Sənaye Universiteti, Azərbaycan
Texniki Universiteti, Bakı Mühəndislik Universiteti, Sumqayıt Dövlət Universiteti
və Xəzər Universiteti iştirak etmişdir. Bu universitetlərdə tədris olunan
müvafiq ixtisasları təmsil edən işçi qruplar tərəfindən iki mərhələdə ingilis
dilində özünütəhlil hesabatı yazılmışdır. Hesabatlarının yekun variantının cari
ilin iyul ayının ortalarında təhvil verilməsi gözlənilir. Bu prosesdə
universitetlərə Tvinninq layihəsi və Təhsil Nazirliyinin Akkreditasiya və
Nostrifikasiya İdarəsi tərəfindən geniş dəstək göstərilmişdir.
Yazılmış
özünütəhlil hesabatları əsasında həmin pilot universitetlərdə müvafiq
ixtisasların bu ilin payızında pilot akkreditasiyasının aparılması gözlənilir.