11-15 mart 2019-cu il tarixlərində Avropa İttifaqının
Tvinninq proqramının “Azərbaycanda ali təhsilin gücləndirilməsinə dəstək” layihəsi
çərçivəsində Azərbaycana növbəti ekspert missiyası həyata keçirilmişdir.
Tvinninq layihəsinin “Təhsil proqramlarının tələbələrə
əsaslanan yanaşmanı əks etdirməsi məqsədi ilə keyfiyyət təminatı sisteminin
daha da təkmilləşdirilməsi” adlı üçüncü komponenti
çərçivəsində ölkəmizə Litvanın İdarəetmə və İqtisadiyyat Universitetinin (ISM
University of Economic and Management) Keyfiyyət Mərkəzinin direktoru Yolita
Butkiene və Latviyanın Akademik Məlumat Mərkəzinin eksperti Asnate Kazoka səfər
etmişlər.
Missiyanın məqsədi pilot olaraq
seçilmiş ali təhsil müəssisələrinin professor-müəllim heyətinin təhsil
proqramlarının özünü qiymətləndirmə prosesinin aparılması sahəsində
təlimləndirilməsi olmuşdur.
Missiya zamanı layihə çərçivəsində
pilot olaraq seçilmiş ali təhsil müəssisələrində (Bakı Dövlət Universiteti,
Azərbaycan Dövlət Pedaqoji Universiteti, Azərbaycan Texniki Universiteti)
Təbiət ixtisasları, Texniki və Texnoloji ixtisaslar və Pedaqoji ixtisaslar
qrupundan pilot olaraq seçilmiş təhsil proqramlarını təmsil edən şəxslər
(kafedra müdiri/müdir müavini, dekan/dekan müavinləri, professor-müəllim heyəti)
iştirakı ilə təhsil proqramlarının özünü qiymətləndirmə hesabatının yazılmasına
dair təlimlər, daha sonra isə təlimlərdə
iştirak etmiş şəxslərlə eyni mövzuda ümumi müzakirələrin aparılması məqsədi ilə
plenar iclas keçirilmişdir.
Keçirilmiş təlimlər zamanı Tvinninq layihəsi çərçivəsində
daha əvvəlki missiyalar zamanı işlənib hazırlanmış “Təhsil proqramlarında səriştə
əsaslı və tələbə yönümlü yanaşmanın özünü təhlili üzrə təlimatlar” adlı sənəd
ali təhsil müəssisələrinin diqqətinə çatdırılmışdır. Təlimlərdə ümumilikdə 128
nəfər universitet nümayəndəsi (BDU, ADPU, AzTU, BMU, ADNSU, SDU) iştirak
etmişdir.
Universitetlər tərəfindən yazılacaq özünü təhlil
hesabatının ən son variantının iyun ayının sonlarında təhvil verilməsi gözlənilir.
Hesabatın yazılmasında sözügedən universitetlərə Tvinninq layihəsinin ekspertləri
və Akkreditasiya şöbəsi tərəfindən yaxından dəstək göstərəcəkdir.