7 - 11 oktyabr 2019-cu il
tarixlərində Tvinninq layihəsinin “AzKÇ nəzərə
alınmaqla və kompetensiya və bacarıqlara əsaslanan nailiyyətlərin təsvir edilməsi
məqsədi ilə prioritet sahələrdəki proqramların təhsil standartlarının təkmilləşdirilməsi
üzrə tövsiyələrin verilməsi” adlı 1.5 saylı Fəaliyyəti çərçivəsində sayca yeddinci
missiya həyata keçirilmişdir.
Missiya Latviya
Universitetinin Məktəbəqədər təhsil və ibtidai təhsil kafedrasının rəhbəri
İneta Helmane, Latviya Universitetinin baş elmi işçisi Antra Ozola və həmin
universitetin Fizika, Riyaziyyat və Optometriya Fakültəsinin layihə üzrə
koordinatoru Janis Mencis tərəfindən həyata keçirilmişdir.
Missiyanın məqsədi müvafiq
olaraq İbtidai sinif müəllimliyi, İnformatika müəllimliyi və Riyaziyyat müəllimliyi
ixtisasları üzrə dövlət standartının yenilənməsindən ibarət olmuşdur.
Missiya çərçivəsində ekspertlər
Bakı Dövlət Universiteti, Azərbaycan Dövlət Pedaqoji Universiteti və Bakı Mühəndislik
Universitetində yuxarıda qeyd olunan ixtisasların tədrisi üzrə ixtisaslaşmış professor-müəllim
heyəti ilə görüşmüş, sözügedən standartların yenilənməsi ilə bağlı onların rəylərini
və təkliflərini öyrənmişlər.
Bundan başqa, ekspertlər Azərbaycan
Dövlət Pedaqoji Universitetinin İbtidai sinif müəllimliyi fakültəsində, Bakı
Dövlət Universiteti, Azərbaycan Dövlət Universiteti və Bakı Mühəndislik
Universitetinin Riyaziyyat və İnformatika müəllimliyi üzrə ixtisaslaşmış fakültələrində
olmuş, daha çox sayda professor-müəllim heyəti ilə görüşərək müzakirələr
aparmış, bu ixtisasların tədrisində istifadə olunan maddi-texniki baza ilə
tanış olmuşlar.
Missiya nəticəsində ekspertlər
yuxarıdakı ixtisaslar üzrə dövlət standartlarında əksini tapmış peşə
kompetensiyalarını yeniləmiş, burada maddi-texniki baza üzrə minimal tələbləri
və məzunlar üçün potensial məşğulluq sahələrini müəyyən etmişlər.
Qeyd edək ki, dövlət
standartının yenilənməsi zamanı ekspertlər dövlət standartlarının Tvinninq layihəsinin
ekspertləri tərəfindən kompetensiya əsaslı yanaşmaya uyğun olaraq işlənib
hazırlanmış yeni formatından istifadə
etmişlər.
Ekspertlər həmçinin ayrı-ayrı
universitetlərdə qeyd olunan ixtisasların tədrisinin təkmilləşdirilməsi istiqamətində
tövsiyələr işləyib hazırlamışlar.