“Azərbaycanda ali təhsilin gücləndirilməsinə
dəstək” adlı Tvinninq layihəsi çərçivəsində layihənin İdarəetmə Komitəsinin
5-ci iclası 13 sentyabr tarixində Təhsil Nazirliyində keçirilib.
İclasda Avropa İttifaqına üzv ölkələri təmsil edən layihə rəhbərləri ilə yanaşı, benefisiar ölkədən Təhsil Nazirliyinin Elm, ali və orta ixtisas təhsili şöbəsinin əməkdaşları, Təhsil Nazirliyinin Beynəlxalq əməkdaşlıq şöbəsinin nümayəndəsi, eləcə də Avropa İttifaqının Bakı Nümayəndəliyinin əməkdaşları iştirak ediblər.
Benefisiar ölkədən layihə rəhbəri cənab Şahin Bayramov ölkə prezidentinin
fərmanı ilə Mingəçevir Dövlət Universitetinin rektoru təyin edildiyindən, görüşdə layihə rəhbərini Təhsil Nazirliyinin Ali təhsil şöbəsinin müdir əvəzi,
Apparat rəhbərinin müavini Yaqub Piriyev əvəz edib.
Piriyev Fransa, Litva və Latviyadan olan layihə rəhbərlərini öz şöbəsi adından salamlayaraq bildirib ki, bu günədək layihə planlaşdırıldığı kimi həyata keçirilmişdir.
O xüsusilə layihə çərçivəsində yenilənməsi üçün seçilmiş pilot təhsil standartlarına toxunub və qeyd edib ki, Tvinninq layihəsinin ekspertləri tərəfindən yenilənəcək təhsil proqramları 2016-cı ildə qəbul edilmiş Strateji Yol Xəritəsinə uyğun seçilmişdir.
Piriyev onu da bildirib ki, Strategiyada prioritet kimi müəyyənləşdirilmiş Kompüter elmləri, İnformasiya Texnologiyaları və Kompüter Mühəndisliyi təhsil proqramları layihə ekspertləri tərəfindən qabaqcıl Avropa təcrübəsi əsasında artıq yenilənmişdir.
O həmçinin qeyd edib ki, Tvinninq layihəsi çərçivəsində yenilənmiş təhsil proqramları növbəti illərdə səriştə əsaslı yeni təhsil proqramlarının hazırlanmasında çox yaxşı bir nümunə olacaq.
Fransadan olan layihə rəhbəri Bruno Curvale öz növbəsində bildirib ki, “öz həmkarlarımızın ehtiyaclarını qarşılamaq üçün əlimizdən gələni edirik”.
“Layihə yerli vəziyyətə uyğunlaşmağa çalışır. Əsl işçi mühit şəraitində işləyirik. Layihənin tamamlanmasına hələ altı ay qalıb”, Curvale bildirib.
Layihə rəhbəri həmçinin layihədən sonra (layihə) fəaliyyətlərinin necə davam edəcəyi barədə də düşünmək lazım olduğunu qeyd edib.
Latviyadan
olan layihə rəhbəri Baiba Ramina öz növbəsində bildirib ki, “layihə uğurla və
rahat şəkildə icra olunmaqdadır. İnanıram ki, layihə çərçivəəsində yaxşı nəticələr
əldə ediləcək”.
Öz növbəsində layihənin kordinatoru Yelizaveta Bydanova
beşinci rüb üzrə layihənin icrası istiqamətində aparılan işləri komponentlər
üzrə iştirakçıların diqqətinə çatdırıb.
“Beşinci rübdə 16 ekspert missiyası və 80 iş günü həyata
keçirilmişdir. Bununla yanaşı, layihə əvvəlindən bu günə qədər 56 ekspert
missiyası və 179 ekspert günü həyata keçirilmişdir”, Bydanova bildirib.
“Layihənin növbəti rübü ərzində layihə kifayət qədər gərgin iş rejimində çalışacaqdır," deyə o əlavə edib.
“Layihənin tədbirlərində çoxlu
sayda insanın qatılması bizə ortaq dil tapmağa kömək edir”, deyə Litvadan olan layihə rəhbəri Giedrius Viliunas bildirib.
Daha sonra benefisiar ölkədən
olan komponent rəhbərləri ötən rüb ərzində rəhbərlik etdkləri komponentlər çərçivəsində görülən işlər
barədə qısa məlumat veriblər.
Sonda Komitə üzvləri tərəfindən növbəti iclasın 2019-cu ilin noyabr ayının 27-də keçirilməsi ilə bağlı qərar qəbul edilib.
***
Hər
üç ölkədən olan layihə rəhbərləri Bakıya səfərləri çərçivəsində həm də
Azərbaycan Texniki Universitetinin yeni təyin olunmuş rektoru Vilayət
Vəliyevlə görüşüblər. Görüş zamanı universitet tərəfindən Tvinninq layihəsi
çərçivəsində görülən işlər və gələcək əməkdaşlıq sahələri müzakirə olunub.