25-29
noyabr 2019-cu il tarixlərində Tvinninq layihəsinin “Hər bir pilot universitetdə
prioritet sahədən olan təhsil proqramının simulyativ akkreditasiyasının həyata keçirilməsi”
adlanan 3.7 saylı fəaliyyəti çərçivəsində sayca üçüncü missiya həyata keçirilmişdir.
Missiya Latviyanın
Akademik Məlumat Mərkəzinin eksperti İlva Qriqoryeva və Latviya Universitetinin
Məktəbəqədər və İbtidai Təhsil kafedrasinin müdiri İneta Helmane tərəfindən həyata
keçirilmişdir.
Missiyanın
məqsədi Tvinninq layihəsinin pilot universitetləri olan Bakı Dövlət Universiteti,
Azərbaycan Dövlət Pedaqoji Universiteti və Bakı Mühəndislik Universitetində
Riyaziyyat müəllimliyi ixtisası üzrə tədris olunan təhsil proqramlarının
simulyativ qiymətləndirilməsinin aparılması olmuşdur.
Yuxarıda
qeyd olunan təhsil proqramının simulyativ qiymətləndirilməsinə cəlb olunmuş
ekspert qrupu iki sahə ekspertindən (bir yerli və bir Avropa İttifaqı eksperti
olmaqla), iki keyfiyyət təminatı ekspertindən (bir yerli və bir Avropa İttifaqı
eksperti olmaqla), bir tələbə və bir işəgötürəndən təşkilatın nümayəndəsindən
ibarət olmuşdur.
Missiyanın
ilk günü ekspertlər Təhsil Nazirliyinin Akkreditasiya şöbəsində toplaşaraq
ATM-lərin Riyaziyyat müəllimliyi proqramı üzrə təqdim etdikləri özünütəhlil
hesabatlarını müzakirə etmiş, müsahiblər zamanı veriləcək sualları üzərində iş
aparmış və digər lazimi hazırlıqları aparmışlar.
Daha sonra
ekspertlər hər üç universitetə bir günlük səfər etmişlər. Sahə səfərləri çərçivəsində
universitetlərin rəhbərliyi, özünütəhlil hesabatını hazırlayan qrupun üzvləri,
tələbələr və işəgötürən təşkilatların nümayəndələri ilə müsahibələr
keçirilmişdir. Ekspertlər həmçinin Riyaziyyat müəllimliyi təhsil proqramının tədrisində
istifadə olunan maddi-texniki bazanı qiymətləndirmək məqsədi ilə universitetlərin
auditoriyalarına və laboratoriyalarlna baxış keçirmişlər.
Simulyativ
qiymətləndirmənin nəticəsi olaraq ekspert qrupu tərəfindən hər bir pilot
universitetdəki Riyaziyyat müəllimliyi təhsil proqramı üzrə yekun qiymətləndirmə
hesabatı hazırlanaraq həmin proqramın daha da təkmilləşdirilməsi istiqamətində tövsiyələr
veriləcəkdir.
Tvinninq
layhəsi çərçivəsində pilot olaraq seçilən digər təhsil proqramlarının (Kimya
mühəndisliyi, İnformatika müəllimliyi, Kompüter elmləri və Xarici dil müəllimliyi)
simulyativ qiymətləndirilməsi növbəti həftələrdə davam edəcək.