13-17 may 2019-cu il tarixlərində Avropa İttifaqının “Azərbaycanda ali təhsilin gücləndirilməsinə dəstək” adlı Tvinninq layihəsi çərçivəsində Azərbaycana növbəti ekspert missiyası həyata keçirilmişdir.

Sözügedən layihənin “Qanunverici və tənzimləyici çərçivəyə düzəlişlərin edilməsi ilə bağlı tövsiyələrin işlənib hazırlanması” adlı  dördüncü komponenti  çərçivəsində ölkəmizə Litvanın Ali Təhsildə Keyfiyyətin Qiymətləndirilməsi üzrə Mərkəzinin informasiya və qiymətləndirmə üzrə mütəxəssisi Kristina Sutkute və Fransanın Lion 2 Universitetinin professoru Jan-Luk Lambole səfər etmişlər.

Missiyanın məqsədi ali təhsil müəssisələrinin təhsil müddətlərinin təlim nəticələri əsasında tanınması sahəsində təlimləndirilməsi olmuşdur.

Missiya çərçivəsində Bakı Dövlət Universiteti, Azərbaycan Dövlət Pedaqoji Universiteti, Azərbaycan Texniki Universiteti və Sumqayıt Dövlət Universitetində layihə çərçivəsində pilot olaraq seçilmiş ixtisaslarla üzrə tədrisin təşkili ilə məşğul olan kafedraların müdirləri, fakültə dekanları və professor-müəllim heyətinin iştirakı ilə seminarlar təşkil olunmuşdur. Seminarlar zamanı universitet nümayəndələri xaricdə əldə olunmuş təhsil müddətlərinin fənlərin ekvivalentliyi deyil, təlim nəticələri əsasında tanınması sahəsində təlimləndirilmiş, belə bir praktikanın tələbələrin mobilliyinə daha geniş imkanlar yaratması onların diqqətin çatdırılmışdır.

Bundan başqa, ekspertlər kompetensiya əsaslı təlim nəticələrinin yazılması qaydaları barədə məlumat vermiş və daha sonra professor-müəllim heyəti ilə bu tip təlim nəticələrinin yazılması ilə bağlı praktiki məşğələ aparlımışdır.

Ekspertlər eləcə də Təhsil Nazirliyinin Elm, ali və orta ixtisas təhsili şöbəsinin əməkdaşları ilə görüşlər keçirilmiş, tələbə mobilliyinə daha geniş imkanların yaradılması məqsədi ilə “Ali təhsil müəssisələrinin bakalavriat və magistratura səviyyələrində kredit sistemi ilə tədrisin təşkili Qaydaları”na nə kimi düzəlişlərin edilməli olduğu ilə bağlı müzakirələr aparılmışdır.