8-12 aprel 2019-cu
il tarixlərində Avropa İttifaqının Tvinninq proqramının “Azərbaycanda ali
təhsilin gücləndirilməsinə dəstək” layihəsi çərçivəsində Azərbaycana növbəti
ekspert missiyası həyata keçirilmişdir.
Tvinninq layihəsinin “Prioritet
sektorlar üzrə pilot təhsil proqramlarının tələbələrə əsaslanan yanaşmanı əks
etdirməsi məqsədi ilə təkmilləşdirilməsi” adlı
ikinci komponenti çərçivəsində ölkəmizə Fransanın Strasburq
Universitetinin Beynəlxalq əlaqələr üzrə prorektoru və həmin universitetin
fizika fakültəsinin dekan müavini Filip Turek səfər edib.
Missiyanın məqsədi Fizika ixtisası
üzrə dövlət standartının layihə çərçivəsində hazırlanmış yeni variantının nəzərdən
keçirilməsi və standartın müəyyən hissələrinin tamamlanması olmuşdur.
Missiya zamanı Bakı Dövlət
Universitetində həmin universitetin və Sumqayıt Dövlət Universitetinin Fizika
fakültəsini təmsil edən professor-müəllim heyətinin iştirakı ilə ikigünlük
seminar keçirilmişdir. Seminarlar zamanı sözügedən dövlət standartının
yeni variantı professor-müəllim heyətinin müzakirəsinə çıxarılmış və həmin sənədin
təkmilləşdirilməsi məqsədi ilə məsləhətləşmələr aparılmışdır.
Bundan
başqa, avropalı ekspert bir neçə işəgötürən təşkilatın nümayəndəsi ilə
görüşmüş, Fizika üzrə dövlət standartının yeni variantında əksini tapan
kompetensiyaları onlarla müzakirə etmişdir.
Sənədin yekun variantının
hazırlanması məqsədi ilə növbəti aylarda Tvinninq layihəsinin eksperti və
universitet nümayəndələrinin iştirakı ilə yeni görüşlərin keçirilməsi
planlaşdırılır.