25 fevral - 1 mart 2019-cu il tarixlərində Avropa İttifaqının “Azərbaycanda
ali təhsilin gücləndirilməsinə dəstək” adlı Tvinninq layihəsi çərçivəsində
Azərbaycana növbəti ekspert missiyası həyata keçirilmişdir.
Sözügedən layihənin “Qanunverici və
tənzimləyici çərçivəyə düzəlişlərin edilməsi ilə bağlı tövsiyələrin işlənib
hazırlanması” adlı dördüncü
komponenti çərçivəsində ölkəmizə Litvanın Ali Təhsildə Keyfiyyətin
Qiymətləndirilməsi üzrə Mərkəzinin informasiya və qiymətləndirmə üzrə
mütəxəssisi Kristina Sutkute və Latviyanın Akademik Məlumat Mərkəzinin
Diplomların Tanınması şöbəsinin müdir müavini İnara Dunska səfər etmişlər.
Missiyanın məqsədi ali təhsil
müəssisələrində təhsil müddətlərinin tanınması üzrə təcrübənin
qiymətləndirilməsi, institusional səviyyədə təhsil müddətlərinin təlim
nəticələrinə əsaslanaraq tanınması ilə bağlı təkliflərin verilməsi, bu sahədəki
qanunvericilik sənədlərinə düzəlişlərlə bağlı təkliflərin işlənib hazırlanması və universitetlərdə tanınma prosedurlarının
təkmilləşdirilməsi ilə bağlı təlimatların hazırlanması olmuşdur.
Missiya çərçivəsində Təhsil Nazirliyinin Elm, ali və orta ixtisas təhsili şöbəsinin, eləcə də Akkreditasiya və Nostrifikasiya İdarəsinin Nostrifikasiya şöbəsinin əməkdaşları ilə görüşlər keçirilmiş, Nostrifikasiya haqqında yeni qanun layihəsi nəzərdən keçirilmiş və sözügedən qanun layihəsinə düzəlişlərin edilməsi ilə bağlı təkliflər işlənib hazırlanmışdır.
Bundan başqa, missiya çərçivəsində Azərbaycan Neft və Sənaye Universiteti, Azərbaycan Dövlət Pedaqoji Universiteti və Azərbaycan Texniki Universitetini təmsil edən nümayəndələrlə görüşlər keçirilmiş, bu universitetlərdə təhsil müddətlərinin tanınması sahəsində cari praktika öyrənilmiş və tanınma qaydalarının Avropa təcrübəsinə uyğun olaraq təkmilləşdirilməsi ilə bağlı tövsiyələr verilmişdir.