Azərbaycan Respublikasının Təhsil Nazirliyi və Avropa İttifaqının “Azərbaycanda ali təhsil sisteminin gücləndirilməsinə dəstək” Tvininq layihəsinin birgə təşkilatçılığı ilə 10 iyul 2020-ci il tarixində saat 11:00-14:00-da Tvinninq layihəsinin yekun konfransı keçirilib.

Onlayn formatda keçirilən konfransın məqsədi son iki ildə həyata keçirilən layihənin nəticələrini yekunlaşdırmaq, layihə çərçivəsində ölkənin ali təhsil sistemində görülən işləri barədə ictimaiyyəti məlumatlandırmaqdır.

Konfransda layihənin rəhbərliyi, eləcə də Azərbaycan Respublikasının təhsil nazirinin müavini Firudin Qurbanov, Təhsil Nazirliyinin Elm, ali və orta ixtisas təhsili şöbəsinin və Təhsildə Keyfiyyət Təminatı Agentliyinin əməkdaşları və layihənin altı pilot universitetlərinin rektorları iştirak etmişlər.

Konfransı giriş sözü ilə açan təhsil nazirinin müavini Firudin Qurbanov bildirmişdir ki, son illər Azərbaycanın ali təhsil sistemində əsaslı islahatlar aparılmış, ali təhsilin əlçatanlığı daha da genişləndirilmişdir. “Azərbaycan Bolonya Prosesinə 2005-ci ildə qoşulmuşdur. Həmin dövrdən başlayaraq Azərbaycanda ali təhsilin keyfiyyətinin yüksəldilməsi, əlçatanlığının genişləndirilməsi, maliyyələşdirilməsi, beynəlxalq əlaqələrin möhkəmləşdirilməsi və digər sahələrində əsaslı islahatlar aparmışdır. Hazırda ölkəmizin ali təhsili 2013-cü ildə təsdiq edilmiş “Azərbaycan Respublikasında təhsilin inkişafı üzrə Dövlət Strategiyası”na və Avropa Ali Təhsil Məkanı çərçivəsində hazırlanmış tövsiyələrə, bu sahədə dünya təcrübəsinə uyğun olaraq inkişaf etdirilir, deyə Firudin Qurbanov qeyd edib.

“Hazırda ali təhsil müəssisələrində dövlət sifarişində təhsil alan tələbələrin sayı təxminən 45% təşkil edir. Dövlət sifarişi üzrə qəbul planı ötən ilə nisbətən 66% növbəti tədris ili üçün əlavə olaraq 7% artırılmışdır. Dünyanı bürümüş COVİD-19 pandemiyasının törətdiyi fəsadları nəzərə alaraq dövlətimiz sosial baxımdan həssas ailə qrupuna aid edilən ailələrin üzvü olan tələbələrin təhsil haqqı xərclərini öz üzərinə götürmüşdür. Bu məqsəd üçün ölkə Prezidentinin müvafiq sərəncamı ilə dövlət büdcəsindən vəsait ayrılmışdır və həmin qərar təxminən 22 min tələbəni əhatə edəcək,” deyə nazir müavini vurğulayıb.  

Daha sonra Avropa İttifaqının Bakı Nümayəndəliyinin rəhbəri, səfir Kestutis Yankauskas çıxış edərək bildirib ki, layihənin pandemiya dövründə öz fəaliyyətinə davam etməsi müsbət bir haldır.

“Bu layihə Avropa İttifaqı və Azərbaycan arasına həyata Tvinninq tərəfdaşlığı proqram çərçivəsində həyata keçirilir.  Azərbaycan Avropa İttifaqı ilə eləcə də Şərq tərəfdaşlığı proqramı çərçivəsində əməkdaşlıq edir. Ötən il bu proqramın artıq 10 illiyi qeyd olundu,” deyə səfir qeyd edib.

Daha sonra layihə rəhbərləri çıxış edərək son iki il ərzində layihə çərçivəsində görülmüş işlərlə bağlı hesabat vermişlər. 

Pilot universitetlərin də rektorları çıxış edərək layihənin universitetlər üçün müsbət nəticələri barədə təqdimatla çıxış ediblər. 

İcrasına 2018-ci ilin aprel ayında başlanılan bu layihə Təhsil Nazirliyi, Fransa, Litva və Latviyanın təmsil olunduğu konsorsium tərəfindən həyata keçirilib. Layihə 2015-2017-ci illərdə “Ali təhsil sisteminin Avropa Ali Təhsil Məkanına inteqrasiyasının daha da gücləndirilməsi istiqamətində Azərbaycan Respublikasının Təhsil Nazirliyinə dəstək” adlı Tvinninq layihəsinin davamı olaraq aparılıb.

Son iki il ərzində icra edilmiş layihənin əsas məqsədi Azərbaycanın ali təhsil sistemini kompetensiyalara, təlim nəticələrinə və tələbəyönümlü yanaşmaya uyğunlaşdırmaqla daha da inkişaf etdirmək ibarət olmuşdur.